Boere wêreldwyd sal volgende jaar van 27 Februarie tot 5 Maart weer meer te wete kan kom oor die wêreld se nuutste en mees diverse landboumasjinerie, -werktuie en verwante tegnologieë. Die Duitse landbouvereniging (DLG) se grootste handelskou in sy soort, Agritechnica, word dan in Hanover, Duitsland, aangebied. Die skou sal fisiek of virtueel bygewoon kan word.
Met die onlangse aanlyn bekendstelling van die digitale Agritechnica, wat op www.DLG-Connect.com aangebied word, het verskeie sprekers die voordele van en kwessies met bestaande en voorgestelde digitale tegnologieë wat bedoel is om die produksiedoeltreffendheid en volhoubare winsgewendheid van plase oral te verbeter, beklemtoon. Die sprekers het ook bespreek hoe digitale tegnologie boere wêreldwyd kan bystaan om te voldoen aan beleidsvereistes en verbruikersvraag na landbouprodukte wat op maniere geproduseer word wat minder skadelik is vir die natuurlike omgewing en klimaat.
Me. Freya von Czettritz, Agritechnica se projekbestuurder, het gesê dat van die sowat 2 000 uitstallers van 50 lande verwag word om hul produkte en innovasies ten toon te stel. Die digitale platform sal voor, tydens en vir geruime tyd ná Agritechnica ’n tegniese program van nasionale en internasionale konferensies, werksessies en kundige aanbiedings sal aanbied.
“Die doel van die tegniese program is om fisieke én virtuele besoekers aan Agritechnica te help om hulle beter voor te berei vir enige beleggingsbesluite oor landboumasjinerie, -werktuie en -tegnologie.”
Mnr. Hubertus Paetow, DLG-president en ook ’n boer, het gesê dit is noodsaaklik dat boere oral volhoubaarheidsoplossings in hul tegniese en finansiële strategieë begin insluit. Byvoorbeeld, die gebruik van digitale tegnologie om net die nodige volumes en tipes onkruiddoders strategies en akkuraat op gewaslande toe te dien, sal ongunstige omgewingsimpakte beperk, terwyl dit ook ’n boer geld bespaar.
Dr. Marcel Wiesehoff, hoofbestuurder van die BanatFarming Group in Roemenië, het gesê hoewel sy boerderybedrywighede by digitale tegnologieë soos selfstuurtoepassings en toepassings vir die wisselende toediening van produkte begin baat vind het, is daar steeds verskeie kwessies. Die algemeenste hiervan was om masjinerie, werktuie, tegnologieë en sagteware van verskillende handelsmerke te kry om naatloos en eenvoudig te integreer en te werk.
Wiesehoff het gesê hy hoop dat interaksies tussen verskillende tegnologie-ontwikkelaars en -vervaardigers, en tussen boere en hierdie tegnologie-verskaffers, tydens Agritechnica moontlike oplossings vir bestaande kwessies met huidige en toekomstige digitale boerderytegnologie sal help lei.
Paetow het gesê dit is noodsaaklik dat alle belanghebbendes, insluitend wetenskaplikes en insetverskaffers, die geleentheid kry om idees uit te ruil om hierdie kwessies te oorkom sodat die volle voordele van digitale hoë-presisietegnologie bereik kan word.
Mnr. Thomas Böck, uitvoerende hoof van die landboumasjinerievervaardiger Claas, het gesê sy maatskappy is deel van verskeie entiteite, soos die ISOBUS-standaardiseringsgroep, waar verskillende landboutegnologie-ontwikkelaars en -vervaardigers saamwerk om die kwessie aan te pak om hierdie tegnologieë te laat integreer en naatloos te laat saamwerk.
Dr. Sjaak Wolfert, ’n strategiese senior wetenskaplike by die Universiteit van Wageningen in Nederland, het gesê om konsep- of nuwe digitale tegnologieë aan boere te wys by geleenthede soos Agritechnica en terugvoer van hulle te kry, kan ontwikkelaars en vervaardigers help om hierdie tegnologieë te verbeter om aan boere se behoeftes op grondvlak te voldoen.
