Voortdurende toetsing van diere vir bek-en-klouseer is een van die metodes waarmee dieregesondheidsowerhede in Noordwes die uitbreking van dié aanmeldbare dieresiekte vinnig onder beheer wil bring.
Landbouweekblad het onlangs berig dat die aangemelde geval van bek-en-klouseer in Noordwes op ’n enkele stoetbeesplaas in die distrik Potchefstroom geïdentifiseer is. Hierdie en “ander verbonde plase” is onmiddellik onder kwarantyn geplaas.
In ’n verklaring het die Rooivleisprodusente-organisasie gesê hierdie geval van bek-en-klouseer ver buite die bestaande bestuursgebiede in Limpopo en KwaZulu-Natal is dalk te wyte aan beeste wat onverantwoordelik en onwettig uit daardie gebiede vervoer is.
Dr. Langa Madyibi, direkteur van veeartsenydienste in Noordwes, sê beeste wat op 18 Maart op ’n veiling in die distrik Potchefstroom gekoop is, was die bron van die siekte. Tot dusver het vier diere positief getoets vir bek-en-klouseer in die onmiddellike omgewing van die plaas waar die eerste geval bevestig is.
Altesaam 217 beeste, skape en bokke wat op die Potchefstroom-veiling verkoop is, is almal nagespoor. Madyibi sê die diere is na afloop van die veiling na die distrikte Vanderbijlpark, Westonaria en Kempton Park in Gauteng geneem sowel as die Vrystaat, asook na die distrikte Ventersdorp en Potchefstroom in Noordwes. Die betrokke plase is almal besoek. Die veeartsenydienste in Gauteng en Vrystaat is ingelig. Die name van die kopers is aan veeartsenydienste bekend.
Hy sê veeartsenydienste en ander owerhede het ’n gesamentlike bedryfskomiteevergadering gehou om planne op te stel vir padblokkades op paaie wat na veilings lei, sodat diere geïnspekteer kan word voordat hulle by veilings aankom.
Noordwes se veeartsenydienste het ook ’n versoek tot die departement van landbou en landelike ontwikkeling gerig om ’n ramptoestand weens die uitbreking van bek-en-klouseer te verklaar.
In ’n brief wat dr. Modupe Letsie, direkteur van veeartsenydienste in die Noord-Kaap, aan al dié provinsie se vee-afslaers en voerkrale gestuur het, beklemtoon hy dat die bevestiging van die siekte in die naburige Noordwes ’n groot risiko vir Noord-Kaapse boere inhou.
Hy doen ’n beroep op afslaers en voerkrale om geen diere na die Noord-Kaap te neem uit enige provinsie waar die bek-en-klouseer siekte bevestig is nie, asook om aan te dring op ’n amptelike gesondheidsklaringsertifikaat van die verkopers van vee uit ander gebiede. Enige tekens van bek-en-klouseer moet onmiddellik onder die aandag van die naaste staatsveeartskantoor gebring word.
