Dit volg nadat die hof vroeër vandeesweek beslis het Simpson moet in aanhouding bly tot sy saak weer in November voorkom. AfriForum het vroeër aangedui dat hy regsondersteuning aan Simpson sal bied.
Simpson word daarvan aangekla dat hy die 17-jarige Qiniso Dlamini tydens ’n worsteling doodgeskiet het nadat Simpson beeste wat na bewering onwettig op sy plaas gewei het, op kraal aangehou het.
AfriForum se vroeëre verklaring lui dat volgens die strafregkenner dr. Llewelyn Curlewis het 'n video wat na berig word deur Simpson se seun van die beweerde worsteling en skietvoorval geneem is, die boer se “volwaardige verweer” teen die moordklag teen hom “onomwonde gestaaf”. Curlewis is deur AfriForum aangestel om die saak onafhanklik te ondersoek.
In sy verklaring gister oor die Glencoe-landdroshof se weiering om borgtog aan Simpson toe te staan, het AfriForum herbevestig hy meen “dit blyk dat daar politieke inmenging in hierdie aangeleentheid is”.
“Ons meen Simpson het ’n sterk verweer, maar dit wil voorkom asof hy reeds deur die publiek skuldig bevind is. Daarom is dit kommerwekkend dat hy borgtog geweier is. Die feit dat opportunistiese politici reeds onrus oor die kwessie begin veroorsaak het, is ook uiters teleurstellend,” sê mnr. Ernst Roets, AfriForum se hoof van beleid en aksie, in die verklaring.
Die woordvoerder van die provinsiale direktoraat van openbare vervolging, me. Natasha Ramkisson-Kara, het aanvanklik gesê Simpson se hofsaak is tot 26 November uitgestel vir verdere ondersoek, maar sy het daarna gesê die verkeerde datum is aangedui en dat die korrekte datum 25 November is.